Hyang Yesus Nuturin Para Sisian Idane
16
Hyang Yesus malih ngandika kapining para sisian Idane sapuniki,
“Makejang paundukane ene pidartayang Tiang tekening ragane apanga kapracayaan ragane tusing ilang.
2 Ragane bakal tusing baanga macelep ka bale-bale wantilan agama Yahudine.
Turmaning bakal teka galahe,
anake ane ngamademang cening makejang mapineh deweknyane bakti kapining Sang Hyang Pengardi.
3 Anake makejang ento malaksana buka keto krana ia tusing nawang Sang Hyang Aji wiadin Tiang.
4 Nanging makejang paundukane ene pidartayang Tiang tekening ragane,
apanga ritatkala galahe ento teka,
ragane inget unduk Tiang suba ngorahin ragane.”
Pakaryan Roh Penulung
“Tiang tusing midartayang paundukane ene uling pengawitne krana Tiang nu bareng-bareng ajak ragane.
5 Sakewala jani Tiang bakal luas ring Sang Hyang Aji sane ngutus Tiang;
lan adiri ja uling ragane tusing ada ane matakon kijake Tiang luas.
6 Nanging ane jani keneh ragane sebet krana Tiang midartayang paundukane ene.
7 Tiang midartayang ane patut tekening ragane:
melah buat ragane yening Tiang luas.
Krana yening Tiang tusing luas,
Roh Penulunge punika nenten jagi rauh sid ragane.
Sakewala,
yening Tiang luas,
Tiang bakal ngutus Ida sid ragane.
8 Ritatkala Roh Penulung punika rauh,
Ida jagi ngedengang kapelihan manusane di jagate ene.
Kapelihannyane buka kene:
unduk manusane madosa,
unduk apa ane patut,
tur unduk manusane bakal kaakimin.
9 Roh Penulunge punika jagi ngedengang tekening manusane makejang
“Unduk manusane madosa ulian tusing pracaya kapining Tiang,
10 “Unduk Tiang sumber makejang ane patut,
krana Tiang luas ring Sang Hyang Aji tur ragane tusing ningalin Tiang buin,
11 “Tur unduk galah pengakiman yakti bakal teka krana I Jaat ane nguasain gumine ene suba kaukum.
12 “Nu liu paundukan ane musti nikayang Tiang teken ragane,
sakewala jani ragane tonden nyidang nerima.
13 Nanging ritatkala Roh Penulung sane ngedengang napi sane patut punika rauh,
Ida bakal nuntun ragane apanga ngerti saluirin paundukan ane patut.
Ida nenten jagi ngandika mawit saking anggan Idane praragan,
nanging mawit saking sane pirengin Ida saking Tiang.
Tur Ida jagi ngortiang tekening ragane paundukan sane benjangan.
14 Ida jagi ngagungang Tiang,
krana Ida jagi ngortiang tekening ragane paundukan ane terima Ida saking Tiang.
15 Saluirin druen Sang Hyang Aji,
pada dados druen Tiange.
Ento mawinan Tiang ngandika yening Rohe punika jagi ngortiang tekening ragane paundukan ane terima Ida saking Tiang.”
Manah Sebet Dados Seneng
16 Hyang Yesus malih ngandika sapuniki,
“Buin akejep sajan ragane tusing bakal ningalin Tiang.
Disubane keto,
tusing mekelo ragane bakal ningalin Tiang buin.”
17 Mirengin pengandikan Hyang Yesuse sekadi punika,
makudang sisian Idane saling mabaos sapuniki,
“Apake artine Ida ngandika buka kene,
‘Buin akejep sajan ragane tusing bakal ningalin Tiang.
Disubane keto,
tusing mekelo ragane bakal ningalin Tiang buin’?
Lan apake artine,
‘Tiang luas ring Sang Hyang Aji’?”
18 Tur ipun malih mataken sapuniki,
“Apake artine,
‘Buin akejep sajan’?
Iraga tusing ja ngerti apa artine pengandikan Idane ento.”
19 Hyang Yesus uning ipun sami meled mataken ring Ida.
Raris Ida ngandika sapuniki,
“Tunian Tiang ngandika buka kene,
‘Buin akejep sajan ragane tusing bakal ningalin Tiang.
Disubane keto,
tusing mekelo ragane bakal ningalin Tiang buin.’
Ento ke ane raosang ragane?”
20 Tiang ngandikayang ane patut,
sujatine ragane bakal ngeling tur sigsigan,
nanging anake ane mabesikan ajak gumine bakal masukarena.
Keneh ragane bakal sebet,
sakewala sebet ragane bakal masalin dadi liang.
21 Umpamane,
yen anak luh sedek nglekadang pianak,
pastika ia nandang sengsara ulian marasa sakit.
Sakewala sasubane pianakne lekad,
ia engsap teken rasa sakitne krana kenehne liang ulian pianakne suba lekad ka gumine.
22 Keto masih ragane makejang:
ane jani keneh ragane sebet.
Sakewala Tiang bakal nyingakin ragane buin lan keneh ragane bakal liang.
Turmaning tusing ja ada anak ane nyidang nyuang rasa liang uling keneh ragane.
23 “Di dinane ento,
ragane tusing buin bakal matakon apa-apa teken Tiang.
Tiang ngandikayang ane patut,
sujatine apa ja ane tunas ragane kapining Sang Hyang Aji,
bakal kicen krana ragane gelah Tiange.
24 Kayang jani ragane tusing nunas apa-apa yadiastun ragane dadi gelah Tiange.
Tunas ja tur ragane bakal nerima,
apanga sukarena ragane sempurna.”
Hyang Yesus Ngalahang Kuasan Gumine
25 Raris Hyang Yesus malih ngandika sapuniki,
“Makejang paundukan ane nikayang Tiang ene nganggon pengumpamaan.
Sakewala bakal teka galahe,
Tiang tusing buin ngandika teken ragane nganggon pengumpamaan.
Ditu Tiang bakal ngandika ane ngilis buat ragane indik Sang Hyang Aji.
26 Duk galahe ento,
ragane bakal mapinunas kapining Sang Hyang Aji krana ragane gelah Tiange.
Padingehang ja!
Tiang tusing perlu buin nunas kapining Sang Hyang Aji buat ragane
27 krana Sang Hyang Aji praragan tresna tekening ragane.
Ida tresna tekening ragane krana ragane tresna tekening Tiang lan pracaya Tiang rauh saking Sang Hyang Aji.
28 Mula saja Tiang rauh saking Sang Hyang Aji tur sampun rauh ka gumine.
Sakewala jani,
Tiang ngalain gumine ene apanga mawali ring Sang Hyang Aji.”
29 Raris para sisian Hyang Yesuse mabaos sapuniki,
“Sane mangkin Iratu ngandika ngilis pisan lan nenten ja malih nganggen pengumpamian.
30 Sane mangkin,
titiang sami uning yening Iratu puniki uning ring sekancan paindikan;
nenten ja perlu manusane mataken napi-napi kapining Iratu.
Punika mawinan titiang sami pracaya Iratu rauh saking Sang Hyang Pengardi.”
31 Hyang Yesus raris nyaurin ipun sami sapuniki,
“Ane jani,
apake ragane pracaya?
32 Padingehang ja!
Galahe bakal teka tatkala ragane makejang sambrag mulih ka umah ragane suang-suang.
Sujatine galahe ento suba teka:
ragane bakal ngalain Tiang praragan.
Sakewala Tiang tusing ja praragan krana Sang Hyang Aji nyarengin Tiang.
33 Makejang paundukane ene nikayang Tiang teken ragane apanga ragane maan dame krana mabesikan ajak Tiang.
Di gumine ene ragane bakal sengsara,
nanging kukuhang ja keneh ragane!
Tiang suba ngalahang kuasan gumine ane jaat.”